Crynodeb

Yn wir mae’r byd gofal iechyd yn llawn prysurdeb felly gallai eiliad neu ddau o lonyddwch deimlo fel nefoedd ar y ddaear. Fodd bynnag, yn ddiweddar daeth grŵp o ymarferwyr gofal iechyd o Fwrdd Iechyd Prifysgol Betsi Cadwaladr i ddarganfod gwir fantais cymryd hoe fach, anadlu’n ddwfn ac ail-gysylltu gyda’r byd naturiol. Gyda’n gilydd, fe wnaethom gwblhau rhaglen lles unigryw ym mherfeddion Coedwig Gwydir; profiad a gynigiodd cyfle i orffwys ond i adfywio’n ogystal.

Fe wnaeth Golygfa Gwydyr greu’r cwrs seiliedig ar natur hwn yn arbennig ar gyfer ymarferwyr gofal iechyd oedd yn teimlo wedi’u llethu gan bwysau cyfrifoldeb parhaus, blinder tosturi a straen emosiynol. Roedd diben y cwrs yn syml ond yn bwerus: cynnig noddfa ar gyfer ymlacio, caredigrwydd, hunan-dosturi, ac adfywio gan ddangos sut mae treulio amser ymhlith coed yn fodd o dawelu’r meddwl ac adfer cydbwysedd.

Rhaglen

Pob wythnos roedd y rhaglen yn ymdrin â thema graidd, gan dywys y rheiny oedd yn cymryd rhan yn ofalus i fwrw golwg dyfnach ar eu lles a chysylltu gyda’r goedwig o’u cwmpas. Bu i’r themâu hyn lywio profiadau ar y cyd y grŵp a chynnig safbwyntiau newydd o ran sut gallai natur helpu gydag adfer.

Bodoli – Gwahoddiad i fodoli’n syml : i gymryd hoe fach, anadlu’n ddwfn a sylwi ar eich hunain yng nghanol y byd naturiol tawel.

Cysylltu – Dysgu i ddaearu’ch hun yn y goedwig, i deimlo’i sefydlogrwydd a’i rhythm, ac i ail-ddarganfod cysylltiad – gyda natur a chi’ch hun.

Symud – Ymchwilio sut gallai symud meddylgar roi hwb i’ch hwyliau, rhyddhau tyndra a chryfhau eich lles cyffredinol.

Casglu – Caniatáu i’r goedwig ysbrydoli eglurder a chreadigrwydd, gan gynnig rhywle i gasglu’ch meddyliau a meithrin syniadau personol.

Ymchwilio – Ymarfer y grefft o gerdded dow i dow ar hyd y dirwedd, heb unrhyw frys, yn agored a gyda chwilfrydedd gan sylwi ar sut mae natur yn llwyddo i dawelu’r meddwl.

Adfer – Agor y galon a’r meddwl i faeth y goedwig, gan brofi sut mae bod ymysg natur yn hybu’ch egni.

Effeithiau a Chanlynoadau

Gyda’i gilydd, bu i’r themâu hyn lunio taith bwerus o ail-gysylltu, daearu ac adfywio; gan ein hatgoffa bod lles yn ymarfer yn ogystal ag yn llwybr yn y bôn, llwybr sydd yn fwyaf effeithiol yn aml os ewch chi ati i’w throedio ymysg y coed. Yn ystod sawl sesiwn ymdrochol, roedd cyfle i’r ymarferwyr gymryd cam yn ôl o bwysau bywyd clinigol a chamu i mewn i dirwedd a oedd yn annog myfyrio ac iacháu. Roedd y gweithgareddau dan arweiniad yn gwahodd pawb i roi’r gorau i ruthro a chael eu gwynt atynt. Roedd y cwrs yn canolbwyntio ar feddylgarwch: anadlu’n ysgafn ac ymarferion gweledol, myfyrdodau symud a llonyddwch, a sesiynau creadigol a myfyrio, i gyd yn awyrgylch braf y goedwig.

Roedd y rhaglen yn adfywio’r unigolion ar y pryd ond roedd hefyd â’r nod o drosglwyddo’r adnoddau ymarferol i’r ymarferwyr allu manteisio arnyn nhw ymhell ar ôl iddyn nhw adael y goedwig. Derbyniodd pob un o’r ymarferwyr ddyddlyfr personol i nodi mewnwelediadau, arsylwadau a strategaethau ymdopi a fyddai’n fodd o feithrin cydbwysedd yn eu bywyd dydd i ddydd a hybu eu lles hirdymor.

Bu i’r daith ar y cyd hon drwy natur ein hatgoffa nad yw iacháu yn berthnasol i’n cleifion yn unig, mae’n bwysig ein bod ni’n ceisio iacháu ein hunain hefyd. Weithiau, yr oll sydd angen inni ei wneud yw dilyn y llwybr i’r goedwig i sicrhau ein bod ni ar y trywydd iawn.